علامہ اقبال کے ق سے اشعار

علامہ محمد اقبال ؒکے ’’ ق ‘‘ سے اشعار

  ( کل تعداد  : 19)

۔۔۔۔۔(1)۔۔۔۔۔

قُدرت کے مقاصد کا عیار اس کے ارادے

دُنیا میں بھی میزان، قیامت میں بھی میزان

۔۔۔۔۔(2)۔۔۔۔۔

قلب میں سوز نہیں، رُوح میں احساس نہیں

کچھ بھی پیغامِ محمّدؐ کا تمھیں پاس نہیں

۔۔۔۔۔(3)۔۔۔۔۔

قلندرانہ ادائیں، سکندرانہ جلال

یہ اُمّتیں ہیں جہاں میں برہنہ شمشیریں

۔۔۔۔۔(4)۔۔۔۔۔

قمر اپنے لباسِ نَو میں بیگانہ سا لگتا تھا

نہ تھا واقف ابھی گردش کے آئینِ مسلّم سے

۔۔۔۔۔(5)۔۔۔۔۔

قناعت نہ کر عالمِ رنگ و بُو پر

چمن اور بھی آشیاں اور بھی ہیں

۔۔۔۔۔(6)۔۔۔۔۔

قُوّتِ عشق سے ہر پست کو بالا کر دے

دہر میں اسمِ محمّدؐ سے اُجالا کر دے

۔۔۔۔۔(7)۔۔۔۔۔

قوم اپنی جو زر و مالِ جہاں پر مرتی

بُت فروشی کے عَوض بُت شکَنی کیوں کرتی!

۔۔۔۔۔(8)۔۔۔۔۔

قوم کیا چیز ہے، قوموں کی امامت کیا ہے

اس کو کیا سمجھیں یہ بیچارے دو رکعت کے امام!

۔۔۔۔۔(9)۔۔۔۔۔

قوم کے ہاتھ سے جاتا ہے متاعِ کردار

بحث میں آتا ہے جب فلسفۂ ذات و صفات

۔۔۔۔۔(10)۔۔۔۔۔

قوم گویا جسم ہے، افراد ہیں اعضائے قوم

منزلِ صنعت کے رہ پیما ہیں دست و پائے قوم

۔۔۔۔۔(11)۔۔۔۔۔

قوم مذہب سے ہے، مذہب جو نہیں، تم بھی نہیں

جذبِ باہم جو نہیں، محفلِ انجم بھی نہیں

۔۔۔۔۔(12)۔۔۔۔۔

قومِ آوارہ عناں تاب ہے پھر سُوئے حجاز

لے اُڑا بلبل بے پر کو مذاقِ پرواز

۔۔۔۔۔(13)۔۔۔۔۔

قوموں کی تقدیر وہ مردِ درویش

جس نے نہ ڈھُونڈی سُلطاں کی درگاہ

۔۔۔۔۔(14)۔۔۔۔۔

قوموں کے لیے موت ہے مرکز سے جُدائی

ہو صاحبِ مرکز تو خودی کیا ہے، خدائی!

۔۔۔۔۔(15)۔۔۔۔۔

قہاّری و غفاّری و قدّوسی و جبروت

یہ چار عناصر ہوں تو بنتا ہے مسلمان

۔۔۔۔۔(16)۔۔۔۔۔

قہر تو یہ ہے کہ کافر کو مِلیں حُور و قصور

اور بیچارے مسلماں کو فقط وعدۂ حور

۔۔۔۔۔(17)۔۔۔۔۔

قیس پیدا ہوں تری محفل میں! یہ ممکن نہیں

تنگ ہے صحرا ترا، محمل ہے بے لیلا ترا

۔۔۔۔۔(18)۔۔۔۔۔

قیدی ہوں اور قفس کو چمن جانتا ہوں میں

غربت کے غم کدے کو وطن جانتا ہوں میں

۔۔۔۔۔(19)۔۔۔۔۔

قُرآن میں ہو غوطہ زن اے مردِ مسلماں

اللہ کرے تجھ کو عطا جِدّتِ کردار

---

آ -  ا -  ب -  پ -  ت -  ٹ -  ج -  چ -  ح -  خ -  د -  ڈ -  ذ -  ر -  ز -  س -  ش

ص -  ض -  ط -  ظ -  ع -  غ -  ف -  ق -  ک -  گ -  ل -  م -  ن -  و -  ہ -  ے

---