علامہ اقبال کے ع سے اشعار

علامہ محمد اقبال ؒکے ’’ع ‘‘ سے اشعار

 ( کل تعداد  : 47)

۔۔۔۔۔(1)۔۔۔۔۔

عارضی لذّت کا شیدائی ہوں، چِلّاتا ہوں مَیں

جلد آ جاتا ہے غصّہ، جلد من جاتا ہوں مَیں

۔۔۔۔۔(2)۔۔۔۔۔

عاشقِ عُزلت ہے دل، نازاں ہوں اپنے گھر پہ مَیں

خندہ زن ہوں مسندِ دارا و اسکندر پہ مَیں

۔۔۔۔۔(3)۔۔۔۔۔

عالمِ سوز و ساز میں وصل سے بڑھ کے ہے فراق

وصل میں مرگِ آرزو، ہجر میں لذّتِ طلب

۔۔۔۔۔(4)۔۔۔۔۔

عام حُریّت کا جو دیکھا تھا خواب اسلام نے

اے مسلماں آج تُو اُس خواب کی تعبیر دیکھ

۔۔۔۔۔(5)۔۔۔۔۔

عجب مزا ہے، مجھے لذّتِ خودی دے کر

وہ چاہتے ہیں کہ مَیں اپنے آپ میں نہ رہوں

۔۔۔۔۔(6)۔۔۔۔۔

عجب نہیں کہ بدل دے اسے نگاہ تری

بُلا رہی ہے تجھے ممکنات کی دنیا

۔۔۔۔۔(7)۔۔۔۔۔

عجب نہیں کہ پریشاں ہے گفتگو میری

فروغِ صبح پریشاں نہیں تو کچھ بھی نہیں

۔۔۔۔۔(8)۔۔۔۔۔

عجَب نہیں کہ خدا تک تری رسائی ہو

تری نگہ سے ہے پوشیدہ آدمی کا مقام

۔۔۔۔۔(9)۔۔۔۔۔

عجب نہیں ہے اگر اس کا سوز ہے ہمہ سوز

کہ نیستاں کے لیے بس ہے ایک چنگاری

۔۔۔۔۔(10)۔۔۔۔۔

عجب واعظ کی دیں‌داری ہے یا رب!

عداوت ہے اسے سارے جہاں سے

۔۔۔۔۔(11)۔۔۔۔۔

عجمی خُم ہے تو کیا، مے تو حجازی ہے مری

نغمہ ہندی ہے تو کیا، لَے تو حجازی ہے مری!

۔۔۔۔۔(12)۔۔۔۔۔

عذابِ دانشِ حاضر سے باخبر ہوں میں

کہ مَیں اس آگ میں ڈالا گیا ہوں مثلِ خلیل

۔۔۔۔۔(14)۔۔۔۔۔

عروجِ آدمِ خاکی سے انجم سہمے جاتے ہیں

کہ یہ ٹُوٹا ہوا تارا مہِ کامل نہ بن جائے

۔۔۔۔۔(15)۔۔۔۔۔

عروجِ آدمِ خاکی کے منتظر ہیں تمام

یہ کہکشاں، یہ ستارے، یہ نیلگُوں افلاک

۔۔۔۔۔(16)۔۔۔۔۔

عزّت ہے محبّت کی قائم اے قیس! حجابِ محمل سے

محمل جو گیا عزّت بھی گئی، غیرت بھی گئی، لَیلا بھی گئی

۔۔۔۔۔(17)۔۔۔۔۔

عشق اب پیرویِ عقلِ خدا داد کرے

آبُرو کوچۂ جاناں میں نہ برباد کرے

۔۔۔۔۔(18)۔۔۔۔۔

عشق بھی ہو حجاب میں، حُسن بھی ہو حجاب میں

یا تو خود آشکار ہو یا مجھے آشکار کر

۔۔۔۔۔(19)۔۔۔۔۔

عشق تری انتہا، عشق مری انتہا

تُو بھی ابھی ناتمام، میں بھی ابھی ناتمام

۔۔۔۔۔(20)۔۔۔۔۔

عشق سے پیدا نوائے زندگی میں زِیر و بم

عشق سے مٹّی کی تصویروں میں سوزِ وم بہ دم

۔۔۔۔۔(21)۔۔۔۔۔

عشق فرمودۂ قاصد سے سبک گام عمل

عقل سمجھی ہی نہیں معنیِ پیغام ابھی

۔۔۔۔۔(22)۔۔۔۔۔

عشق فقیہِ حرم، عشق امیرِ جُنود

عشق ہے ابن السّبیل، اس کے ہزاروں مقام

۔۔۔۔۔(23)۔۔۔۔۔

عشق کا دل بھی وہی، حُسن کا جادو بھی وہی

اُمّتِ احمدِ مرسلؐ بھی وہی، تُو بھی وہی

۔۔۔۔۔(24)۔۔۔۔۔

عشق کچھ محبوب کے مرنے سے مر جاتا نہیں

روح میں غم بن کے رہتا ہے، مگر جاتا نہیں

۔۔۔۔۔(25)۔۔۔۔۔

عشق کو فریاد لازم تھی سو وہ بھی ہو چُکی

اب ذرا دل تھام کر فریاد کی تاثیر دیکھ

۔۔۔۔۔(26)۔۔۔۔۔

عشق کی اِک جست نے طے کر دیا قصّہ تمام

اس زمین و آسماں کو بےکراں سمجھا تھا میں

۔۔۔۔۔(27)۔۔۔۔۔

عشق کی آشفتگی نے کر دیا صحرا جسے

مُشتِ خاک ایسی نہاں زیرِ قبا رکھتا ہوں میں

۔۔۔۔۔(28)۔۔۔۔۔

عشق کی تقویم میں عصرِرواں کے سوا

اور زمانے بھی ہیں جن کا نہیں کوئی نام

۔۔۔۔۔(29)۔۔۔۔۔

عشق کی گرمی سے شعلے بن گئے چھالے مرے

کھیلتے ہیں بجلیوں کے ساتھ اب نالے مرے

۔۔۔۔۔(30)۔۔۔۔۔

عشق کی گرمی سے ہے معرکۂ کائنات

علم مقامِ صفات، عشق تماشائے ذات

۔۔۔۔۔(31)۔۔۔۔۔

عشق کے خورشید سے شامِ اجل شرمندہ ہے

عشق سوزِ زندگی ہے، تا ابد پائندہ ہے

۔۔۔۔۔(32)۔۔۔۔۔

عشق کے دام میں پھنس کر یہ رِہا ہوتا ہے

برق گرتی ہے تو یہ نخل ہرا ہوتا ہے

۔۔۔۔۔(33)۔۔۔۔۔

عشق کے مِضراب سے نغمۂ تارِ حیات

عشق سے نُورِ حیات، عشق سے نارِ حیات

۔۔۔۔۔(34)۔۔۔۔۔

عصرِ حاضر مَلک الموت ہے تیرا، جس نے

قبض کی رُوح تری دے کے تجھے فکرِ معاش

۔۔۔۔۔(35)۔۔۔۔۔

عطا ایسا بیاں مجھ کو ہُوا رنگیں بیانوں میں

کہ بامِ عرش کے طائر ہیں میرے ہم زبانوں میں

۔۔۔۔۔(36)۔۔۔۔۔

عقابی رُوح جب بیدار ہوتی ہے جوانوں میں

نظر آتی ہے اس کو اپنی منزل آسمانوں میں

۔۔۔۔۔(37)۔۔۔۔۔

عقابی شان سے جھپٹے تھے جو، بے بال و پر نکلے

ستارے شام کے خُونِ شفق میں ڈُوب کر نکلے

۔۔۔۔۔(38)۔۔۔۔۔

عقل عیّار ہے، سَو بھیس بنا لیتی ہے

عشق بے چارہ نہ مُلّا ہے نہ زاہد نہ حکیم!

۔۔۔۔۔(39)۔۔۔۔۔

عقل کو تنقید سے فرصت نہیں

عشق پر اعمال کی بنیاد رکھ

۔۔۔۔۔(40)۔۔۔۔۔

عقل کو ملتی نہیں اپنے بتوں سے نجات

عارف و عامی تمام بندۂ لات و منات

۔۔۔۔۔(41)۔۔۔۔۔

عقل ہے بے زمام ابھی، عشق ہے بے مقام ابھی

نقش گرِ اَزل! ترا نقش ہے نا تمام ابھی

۔۔۔۔۔(42)۔۔۔۔۔

عقل ہے تیری سِپَر، عشق ہے شمشیر تری

مرے درویش! خلافت ہے جہاں‌گیر تری

۔۔۔۔۔(43)۔۔۔۔۔

علاجِ درد میں بھی درد کی لذّت پہ مرتا ہُوں

جو تھے چھالوں میں کانٹے، نوکِ سوزن سے نکالے ہیں

۔۔۔۔۔(44)۔۔۔۔۔

علم کا ’موجود‘ اور، فقر کا ’موجود‘ اور

اَ شْھَدُ اَنْ لَّا اِلٰہ‘ اَ شْھَدُ اَنْ لاَّ اِلٰہ!

۔۔۔۔۔(45)۔۔۔۔۔

علم میں دولت بھی ہے، قُدرت بھی ہے، لذّت بھی ہے

ایک مشکل ہے کہ ہاتھ آتا نہیں اپنا سُراغ

۔۔۔۔۔(46)۔۔۔۔۔

علم نے مجھ سے کہا عشق ہے دیوانہ‌پن

عشق نے مجھ سے کہا علم ہے تخمین و ظن

۔۔۔۔۔(47)۔۔۔۔۔

عمل سے زندگی بنتی ہے جنّت بھی، جہنّم بھی

یہ خاکی اپنی فطرت میں نہ نوری ہے نہ ناری ہے

---

آ -  ا -  ب -  پ -  ت -  ٹ -  ج -  چ -  ح -  خ -  د -  ڈ -  ذ -  ر -  ز -  س -  ش

ص -  ض -  ط -  ظ -  ع -  غ -  ف -  ق -  ک -  گ -  ل -  م -  ن -  و -  ہ -  ے

---