علامہ اقبال کے ے سے اشعار

علامہ اقبال ؒ کے’’ ے ‘‘ سے  اشعار

(کل تعداد  :  45)

۔۔۔۔۔(1)۔۔۔۔۔

یا باہم پیار کے جلسے تھے، دستورِ محبّت قائم تھا
یا بحث میں اُردو ہندی ہے یا قربانی یا جھٹکا ہے

۔۔۔۔۔(2)۔۔۔۔۔

یا مری آہ میں کوئی شررِ زندہ نہیں
یا ذرا نم ابھی تیرے خس و خاشاک میں ہے

۔۔۔۔۔(3)۔۔۔۔۔

یا رب! دلِ مسلم کو وہ زندہ تمنّا دے
جو قلب کو گرما دے، جو رُوح کو تڑپا دے

۔۔۔۔۔(4)۔۔۔۔۔

یاں تو اک مصرع میں پہلو سے نکل جاتا ہے دل
شعر کی گرمی سے کیا واں بھی پگھل جاتا ہے دل؟

۔۔۔۔۔(5)۔۔۔۔۔

یقیں افراد کا سرمایۂ تعمیرِ مِلّت ہے
یہی قوّت ہے جو صورت گرِ تقدیر مِلّت ہے

۔۔۔۔۔(6)۔۔۔۔۔

یقیں پیدا کر اے ناداں! یقیں سے ہاتھ آتی ہے
وہ درویشی، کہ جس کے سامنے جھُکتی ہے فغفوری

۔۔۔۔۔(7)۔۔۔۔۔

یقیں محکم، عمل پیہم، محبّت فاتحِ عالم
جہادِ زِندگانی میں ہیں یہ مردوں کی شمشیریں

۔۔۔۔۔(8)۔۔۔۔۔

یورپ کی غلامی پہ رضا مند ہوا تُو
مجھ کو تو گِلہ تجھ سے ہے، یورپ سے نہیں ہے!

۔۔۔۔۔(9)۔۔۔۔۔

یورپ کے کرگسوں کو نہیں ہے ابھی خبر
ہے کتنی زہر ناک ابی سِینیا کی لاش

۔۔۔۔۔(10)۔۔۔۔۔

یوں بھی دستورِ گُلستاں کو بدل سکتے ہیں
کہ نشیمن ہو عنادل پہ گراں مثلِ قفَس

۔۔۔۔۔(11)۔۔۔۔۔

یوں تو اے بزمِ جہاں! دِلکش تھے ہنگامے ترے
اک ذرا افسردگی تیرے تماشاؤں میں تھی

۔۔۔۔۔(12)۔۔۔۔۔

یوں تو روشن ہے مگر سوزِ درُوں رکھتا نہیں
شُعلہ ہے مثلِ چراغِ لالۂ صحرا ترا

۔۔۔۔۔(13)۔۔۔۔۔

وں تو سیّد بھی ہو، مرزا بھی ہو، افغان بھی ہو
تم سبھی کچھ ہو، بتاؤ تو مسلمان بھی ہو!

۔۔۔۔۔(14)۔۔۔۔۔

یہ اتّفاق مبارک ہو مومنوں کے لیے
کہ یک زباں ہیں فقیہانِ شہر میرے خلاف

۔۔۔۔۔(15)۔۔۔۔۔

یہ استغنا ہے، پانی میں نگوں رکھتا ہے ساغر کو
تجھے بھی چاہیے مثلِ حبابِ آبجو رہنا

۔۔۔۔۔(16)۔۔۔۔۔

یہ ایک سجدہ جسے تُو گراں سمجھتا ہے
ہزار سجدے سے دیتا ہے آدمی کو نجات!

۔۔۔۔۔(17)۔۔۔۔۔

یہ آفتاب کیا، یہ سِپہرِ بریں ہے کیا!
سمجھا نہیں تسلسلِ شام و سحَر کو مَیں

۔۔۔۔۔(18)۔۔۔۔۔

یہ آگہی مری مجھے رکھتی ہے بے قرار
خوابیدہ اس شرر میں ہیں آتش کدے ہزار

۔۔۔۔۔(19)۔۔۔۔۔

یہ بندگی خدائی، وہ بندگی گدائی
یا بندۂ خدا بن یا بندۂ زمانہ!

۔۔۔۔۔(20)۔۔۔۔۔

یہ بُت کدہ اُنھی غارت گروں کی ہے تعمیر
دمشق ہاتھ سے جن کے ہُوا ہے ویرانہ

۔۔۔۔۔(21)۔۔۔۔۔

یہ پیام دے گئی ہے مجھے بادِ صُبح گاہی
کہ خودی کے عارفوں کا ہے مقام پادشاہی

۔۔۔۔۔(22)۔۔۔۔۔

یہ ثابت بھی ہے اور سیاّر بھی
عناصر کے پھندوں سے بیزار بھی

۔۔۔۔۔(23)۔۔۔۔۔

یہ جنّت مبارک رہے زاہدوں کو
کہ میں آپ کا سامنا چاہتا ہوں

۔۔۔۔۔(24)۔۔۔۔۔

یہ دستورِ زباں بندی ہے کیسا تیری محفل میں
یہاں تو بات کرنے کو ترستی ہے زباں میری

۔۔۔۔۔(25)۔۔۔۔۔

یہ دنیا دعوتِ دیدار ہے فرزندِ آدم کو
کہ ہر مستور کو بخشا گیا ہے ذوقِ عُریانی

۔۔۔۔۔(26)۔۔۔۔۔

یہ دَور نُکتہ چیں ہے، کہیں چھُپ کے بیٹھ رہ
جس دل میں تُو مکیں ہے، وہیں چھپ کے بیٹھ رہ

۔۔۔۔۔(27)۔۔۔۔۔

یہ راز کسی کو نہیں معلوم کہ مومن
قاری نظر آتا ہے، حقیقت میں ہے قُرآن!

۔۔۔۔۔(28)۔۔۔۔۔

یہ رسمِ بزمِ فنا ہے اے دل! گناہ ہے جنبشِ نظر بھی
رہے گی کیا آبرُو ہماری جو تُو یہاں بے قرار ہو گا

۔۔۔۔۔(29)۔۔۔۔۔

یہ زائرانِ حریم مغرب ہزار رہبر بنیں ہمارے
ہمیں بھلا ان سے واسطہ کیا جو تجھ سے ناآشنا رہے ہیں

۔۔۔۔۔(30)۔۔۔۔۔

یہ زورِ دست و ضربتِ کاری کا ہے مقام
میدانِ جنگ میں نہ طلب کر نوائے چنگ

۔۔۔۔۔(31)۔۔۔۔۔

یہ سب کچھ ہے مگر ہستی مری مقصد ہے قُدرت کا
سراپا نور ہو جس کی حقیقت، مَیں وہ ظلمت ہوں

۔۔۔۔۔(32)۔۔۔۔۔

یہ عِلم، یہ حِکمت، یہ تدبُّر، یہ حکومت
پیتے ہیں لہُو، دیتے ہیں تعلیمِ مساوات

۔۔۔۔۔(33)۔۔۔۔۔

یہ غازی، یہ تیرے پُر اسرار بندے
جنھیں تُو نے بخشا ہے ذوقِ خدائی

۔۔۔۔۔(34)۔۔۔۔۔

یہ فیضانِ نظر تھا یا کہ مکتب کی کرامت تھی
سِکھائے کس نے اسمٰعیلؑ کو آدابِ فرزندی

۔۔۔۔۔(35)۔۔۔۔۔

یہ کافری تو نہیں، کافری سے کم بھی نہیں
کہ مردِ حق ہو گرفتارِ حاضر و موجود

۔۔۔۔۔(36)۔۔۔۔۔

یہ گھڑی محشر کی ہے، تُو عرصۂ محشر میں ہے
پیش کر غافل، عمل کوئی اگر دفتر میں ہے!

۔۔۔۔۔(37)۔۔۔۔۔

یہ مرقد سے صدا آئی، حرم کے رہنے والوں کو
شکایت تجھ سے ہے اے تارکِ آئینِ آبائی!

۔۔۔۔۔(38)۔۔۔۔۔

یہ مصرع لکھ دیا کس شوخ نے محرابِ مسجد پر
یہ ناداں گر گئے سجدوں میں جب وقتِ قیام آیا

۔۔۔۔۔(39)۔۔۔۔۔

یہ مقصد تھا مرا اس سے، کوئی تیمور کی بیٹی
مجھے غافل سمجھ کر مار ڈالے میرے خنجر سے

۔۔۔۔۔(40)۔۔۔۔۔

یہ مہر و مہ، یہ ستارے یہ آسمانِ کبود
کسے خبر کہ یہ عالم عدَم ہے یا کہ وجود

۔۔۔۔۔(41)۔۔۔۔۔

یہ نہ ساقی ہو تو پھرمے بھی نہ ہو، خُم بھی نہ ہو
بزمِ توحید بھی دنیا میں نہ ہو، تم بھی نہ ہو

۔۔۔۔۔(42)۔۔۔۔۔

یہ نیلگوں فضا جسے کہتے ہیں آسماں
ہِمّت ہو پَرکُشا تو حقیقت میں کچھ نہیں

۔۔۔۔۔(43)۔۔۔۔۔

یہی آئینِ قدرت ہے، یہی اسلوبِ فطرت ہے
جو ہے راہِ عمل میں گام زن، محبوبِ فطرت ہے

۔۔۔۔۔(44)۔۔۔۔۔

یہی فرزندِ آدم ہے کہ جس کے اشکِ خُونیں سے
کِیا ہے حضرتِ یزداں نے دریاؤں کو طوفانی

۔۔۔۔۔(45)۔۔۔۔۔

یہی مقصودِ فطرت ہے، یہی رمزِ مسلمانی
اُخُوّت کی جہاں‌گیری، محبّت کی فراوانی

---

آ -  ا -  ب -  پ -  ت -  ٹ -  ج -  چ -  ح -  خ -  د -  ڈ -  ذ -  ر -  ز -  س -  ش

ص -  ض -  ط -  ظ -  ع -  غ -  ف -  ق -  ک -  گ -  ل -  م -  ن -  و -  ہ -  ے

---