علامہ اقبال کے م سے اشعار

علامہ محمد اقبال ؒکے ’’ م ‘‘ سے اشعار

(  کل تعداد : 109)

۔۔۔۔۔(1)۔۔۔۔۔

ماسِوَی اللہ کے لیے آگ ہے تکبیر تری
تُو مسلماں ہو تو تقدیر ہے تدبیر تری

۔۔۔۔۔(2)۔۔۔۔۔

مانا کہ تیری دید کے قابل نہیں ہوں میں
تُو میرا شوق دیکھ، مرا انتظار دیکھ

۔۔۔۔۔(3)۔۔۔۔۔

مانگنے والا گدا ہے، صدقہ مانگے یا خراج
کوئی مانے یا نہ مانے، مِیرو سُلطاں سب گدا!

۔۔۔۔۔(4)۔۔۔۔۔

مبتلائے درد کوئی عُضو ہو روتی ہے آنکھ
کس قدر ہمدرد سارے جسم کی ہوتی ہے آنکھ

۔۔۔۔۔(5)۔۔۔۔۔

متاعِ بےبہا ہے درد و سوزِ آرزومندی
مقام بندگی دے کر نہ لوں شانِ خداوندی

۔۔۔۔۔(6)۔۔۔۔۔

متاعِ دین و دانش لٹ گئی اللہ والوں کی
یہ کس کافر ادا کا غمزۂ خُوں‌ریز ہے ساقی

۔۔۔۔۔(7)۔۔۔۔۔

متاعِ غیر پہ ہوتی ہے جب نظر اس کی
تو ہیں ہراولِ لشکر کلِیسیا کے سفیر!

۔۔۔۔۔(8)۔۔۔۔۔

مٹا دیا مرے ساقی نے عالمِ من و تو
پلا کے مجھ کو مئے ’لاَ اِلٰہَ اِلاَّ ھُو‘

۔۔۔۔۔(9)۔۔۔۔۔

مٹایا قیصر و کسریٰ کے استبداد کو جس نے
وہ کیا تھا، زورِ حیدرؓ، فقرِ بُوذرؓ، صِدقِ سلمانیؓ

۔۔۔۔۔(10)۔۔۔۔۔

مثالِ ماہ چمکتا تھا جس کا داغِ سجود
خرید لی ہے فرنگی نے وہ مسلمانی

۔۔۔۔۔(11)۔۔۔۔۔

مثل انجم اُفق قوم پہ روشن بھی ہوئے
بُت ہندی کی محبت میں بَرہمن بھی ہوئے

۔۔۔۔۔(12)۔۔۔۔۔

مثل خورشیدِ سحر فکر کی تابانی میں
بات میں سادہ و آزادہ، معانی میں دقیق

۔۔۔۔۔(13)۔۔۔۔۔

مثلِ کلیم ہو اگر معرکہ آزما کوئی
اب بھی درختِ طُور سے آتی ہے بانگِ’ لاَ تَخَفْ‘

۔۔۔۔۔(14)۔۔۔۔۔

مجاہدانہ حرارت رہی نہ صُوفی میں
بہانہ بے عملی کا بنی شراب الست

۔۔۔۔۔(15)۔۔۔۔۔

مجلس ملّت ہو یا پرویز کا دربار ہو
ہے وہ سُلطاں، غیر کی کھیتی پہ ہو جس کی نظر

۔۔۔۔۔(16)۔۔۔۔۔

مجنوں نے شہر چھوڑا تو صحرا بھی چھوڑ دے
نظارے کی ہوس ہو تو لیلیٰ بھی چھوڑ دے

۔۔۔۔۔(17)۔۔۔۔۔

مجھ کو پیدا کر کے اپنا نکتہ چیں پیدا کیا
نقش ہوں، اپنے مصوّر سے گلا رکھتا ہوں میں

۔۔۔۔۔(18)۔۔۔۔۔

مجھ کو تو سکھا دی ہے افرنگ نے زِندیقی
اس دور کے مُلّا ہیں کیوں ننگ مسلمانی!

۔۔۔۔۔(19)۔۔۔۔۔

مجھ کو تو یہ دنیا نظر آتی ہے دگرگوں
معلوم نہیں دیکھتی ہے تیری نظر کیا

۔۔۔۔۔(20)۔۔۔۔۔

مجھ کو جو موج نفس دیتی ہے پیغامِ اجل
لب اسی موج نفس سے ہے نوا پیرا ترا

۔۔۔۔۔(21)۔۔۔۔۔

مجھ کو دیتے ہیں ایک بُوند لہو
صِلہ شب بھر کی تشنہ کامی کا

۔۔۔۔۔(22)۔۔۔۔۔

مجھ کو بھی نظر آتی ہے یہ بوقلمونی
وہ چاند، یہ تارا ہے، وہ پتھر، یہ نگیں ہے

۔۔۔۔۔(23)۔۔۔۔۔

مجھ میں فریاد جو پنہاں ہے، سناؤں کس کو
تپش شوق کا نظارہ دکھاؤں کس کو

۔۔۔۔۔(24)۔۔۔۔۔

مجھے اے ہم نشیں رہنے دے شغل سینہ کاوی میں
کہ میں داغ محبّت کو نمایاں کر کے چھوڑوں گا

۔۔۔۔۔(25)۔۔۔۔۔

مجھے آہ و فغانِ نیم شب کا پھر پیام آیا
تھم اے رہرو کہ شاید پھر کوئی مشکل مقام آیا

۔۔۔۔۔(26)۔۔۔۔۔

مجھے پھونکا ہے سوز قطرۂ اشک محبّت نے
غضب کی آگ تھی پانی کے چھوٹے سے شرارے میں

۔۔۔۔۔(27)۔۔۔۔۔

مجھے تہذیبِ حاضر نے عطا کی ہے وہ آزادی
کہ ظاہر میں تو آزادی ہے، باطن میں گرفتاری

۔۔۔۔۔(28)۔۔۔۔۔

مجھے خبر نہیں یہ شاعری ہے یا کچھ اور
عطا ہُوا ہے مجھے ذکر و فکر و جذب و سرود

۔۔۔۔۔(29)۔۔۔۔۔

مجھے رازِ دو عالم دل کا آئینہ دِکھاتا ہے
وہی کہتا ہوں جو کچھ سامنے آنکھوں کے آتا ہے

۔۔۔۔۔(30)۔۔۔۔۔

مجھے روکے گا تُو اے ناخدا کیا غرق ہونے سے
کہ جن کو ڈوبنا ہو، ڈوب جاتے ہیں سفینوں میں

۔۔۔۔۔(31)۔۔۔۔۔

مجھے رلاتی ہے اہل جہاں کی بیدردی
فغانِ مُرغِ سحر خواں کو جانتے ہیں سرود

۔۔۔۔۔(32)۔۔۔۔۔

مجھے سزا کے لیے بھی نہیں قبول وہ آگ
کہ جس کا شعلہ نہ ہو تُند و سرکش و بے باک!

۔۔۔۔۔(33)۔۔۔۔۔

مجھے فطرت نَوا پر پے بہ پے مجبور کرتی ہے
ابھی محفل میں ہے شاید کوئی درد آشنا باقی

۔۔۔۔۔(34)۔۔۔۔۔

محبّت کے شرر سے دل سراپا نور ہوتا ہے
ذرا سے بیج سے پیدا ریاضِ طور ہوتا ہے

۔۔۔۔۔(35)۔۔۔۔۔

محبّت کے لیے دل ڈھُونڈ کوئی ٹُوٹنے والا
یہ وہ مے ہے جسے رکھتے ہیں نازک آبگینوں میں

۔۔۔۔۔(36)۔۔۔۔۔

محبّت مجھے اُن جوانوں سے ہے
ستاروں پہ جو ڈالتے ہیں کمند

۔۔۔۔۔(37)۔۔۔۔۔

محبّت ہی سے پائی ہے شفا بیمار قوموں نے
کیا ہے اپنے بخت خفتہ کو بیدار قوموں نے

۔۔۔۔۔(38)۔۔۔۔۔

محبّت ہی وہ منزل ہے کہ منزل بھی ہے، صحرا بھی
جرَس بھی، کارواں بھی، راہبر بھی، راہزن بھی ہے

۔۔۔۔۔(39)۔۔۔۔۔

محبّت خویشتن بینی، محبّت خویشتن داری
محبّت آستانِ قیصر و کسریٰ سے بے پروا

۔۔۔۔۔(40)۔۔۔۔۔

محرم خودی سے جس دم ہُوا فقر
تُو بھی شہنشاہ، مَیں بھی شہنشاہ!

۔۔۔۔۔(41)۔۔۔۔۔

محروم رہا دولتِ دریا سے وہ غوّاص
کرتا نہیں جو صحبت ساحل سے کنارا

۔۔۔۔۔(42)۔۔۔۔۔

محروم تماشا کو پھر دیدۂ بینا دے
دیکھا ہے جو کچھ میں نے اَوروں کو بھی دکھلا دے

۔۔۔۔۔(43)۔۔۔۔۔

محسوس پر بِنا ہے علوم جدید کی
اس دور میں ہے شیشہ عقائد کا پاش پاش

۔۔۔۔۔(44)۔۔۔۔۔

محفل نو میں پرانی داستانوں کو نہ چھیڑ
رنگ پر جو اَب نہ آئیں اُن فسانوں کو نہ چھیڑ

۔۔۔۔۔(45)۔۔۔۔۔

محکوم کا دل مُردہ و افسردہ و نومید
آزاد کا دل زندہ و پُرسوز و طرب ناک

۔۔۔۔۔(46)۔۔۔۔۔

محکوم کے حق میں ہے یہی تربیت اچھی
موسیقی و صورت گری و علم نباتات!

۔۔۔۔۔(47)۔۔۔۔۔

محکوم ہو سالک تو یہی اس کا ’ہمہ اوست‘
خود مُردہ و خود مرقد و خود مرگ مفاجات!

۔۔۔۔۔(48)۔۔۔۔۔

محکوم ہے بیگانۂ اخلاص و مروّت
ہر چند کہ منطق کی دلیلوں میں ہے چالاک

۔۔۔۔۔(49)۔۔۔۔۔

محنت و سرمایہ دنیا میں صف آرا ہو گئے
دیکھئے ہوتا ہے کس کس کی تمنّاؤں کا خُون

۔۔۔۔۔(50)۔۔۔۔۔

مدّعا تیرا اگر دنیا میں ہے تعلیم دیں
ترکِ دنیا قوم کو اپنی نہ سِکھلانا کہیں

۔۔۔۔۔(51)۔۔۔۔۔

مذہب سے ہم آہنگی افراد ہے باقی
دیں زخمہ ہے، جمعیت مِلّت ہے اگر ساز

۔۔۔۔۔(52)۔۔۔۔۔

مذہب نہیں سکھاتا آپس میں بَیر رکھنا
ہندی ہیں ہم، وطن ہے ہندوستاں ہمارا

۔۔۔۔۔(53)۔۔۔۔۔

مر کے جی اُٹھنا فقط آزاد مردوں کا ہے کام
گرچہ ہر ذی‌رُوح کی منزل ہے آغوشِ لَحد

۔۔۔۔۔(54)۔۔۔۔۔

مرا دل، مری رزم گاہِ حیات
گمانوں کے لشکر، یقیں کا ثبات

۔۔۔۔۔(55)۔۔۔۔۔

مرا رونا نہیں، رونا ہے یہ سارے گُلستاں کا
وہ گُل ہوں مَیں، خزاں ہر گُل کی ہے گویا خزاں میری

۔۔۔۔۔(56)۔۔۔۔۔

مرا طریق امیری نہیں، فقیری ہے
خودی نہ بیچ، غریبی میں نام پیدا کر!

۔۔۔۔۔(57)۔۔۔۔۔

مردِ خدا کا عمل عشق سے صاحب فروغ
عشق ہے اصلِ حیات، موت ہے اس پر حرام

۔۔۔۔۔(58)۔۔۔۔۔

مرض کہتے ہیں سب اس کو، یہ ہے لیکن مرض ایسا
چھپا جس میں علاجِ گردش چرخِ کہن بھی ہے

۔۔۔۔۔(59)۔۔۔۔۔

مرنے والے مرتے ہیں لیکن فنا ہوتے نہیں
یہ حقیقت میں کبھی ہم سے جُدا ہوتے نہیں

۔۔۔۔۔(60)۔۔۔۔۔

مری خودی بھی سزا کی ہے مستحق لیکن
زمانہ دار و  رسن کی تلاش میں ہے ابھی

۔۔۔۔۔(61)۔۔۔۔۔

مری نگاہ میں وہ رند ہی نہیں ساقی
جو ہوشیاری و مستی میں امتیاز کرے

۔۔۔۔۔(62)۔۔۔۔۔

مری نگاہ میں ہے یہ سیاستِ لا دِیں
کنیزِ اہرمن و دُوں نہاد و مُردہ ضمیر

۔۔۔۔۔(63)۔۔۔۔۔

مری نوائے پریشاں کو شاعری نہ سمجھ
کہ مَیں ہوں محرمِ رازِ دُرونِ میخانہ

۔۔۔۔۔(64)۔۔۔۔۔

مرے اشعار اے اقبالؔ! کیوں پیارے نہ ہوں مجھ کو
مرے ٹُوٹے ہُوئے دل کے یہ درد انگیز نالے ہیں

۔۔۔۔۔(65)۔۔۔۔۔

مرے اللہ! بُرائی سے بچانا مجھ کو
نیک جو راہ ہو، اُس رہ پہ چلانا مجھ کو

۔۔۔۔۔(66)۔۔۔۔۔

مرے دیدار کی ہے اک یہی شرط
کہ تُو پنہاں نہ ہو اپنی نظر سے

۔۔۔۔۔(67)۔۔۔۔۔

مستِ مئے خرام کا سُن تو ذرا پیام تُو
زندہ وہی ہے کام کچھ جس کو نہیں قرار سے

۔۔۔۔۔(68)۔۔۔۔۔

مسجد تو بنا دی شب بھر میں ایماں کی حرارت والوں نے
من اپنا پُرانا پاپی ہے، برسوں میں نمازی بن نہ سکا

۔۔۔۔۔(69)۔۔۔۔۔

مسلماں کو مسلماں کر دیا طوفانِ مغرب نے
تلاطم ہائے دریا ہی سے ہے گوہر کی سیرابی

۔۔۔۔۔(70)۔۔۔۔۔

مسلماں کے لہو میں ہے سلیقہ دل نوازی کا
مرّوت حُسنِ عالم‌گیر ہے مردانِ غازی کا

۔۔۔۔۔(71)۔۔۔۔۔

مشرق سے ہو بیزار، نہ مغرب سے حذر کر
فطرت کا اشارہ ہے کہ ہر شب کو سحر کر!

۔۔۔۔۔(72)۔۔۔۔۔

مشرق میں اصول دین بن جاتے ہیں
مغرب میں مگر مشین بن جاتے ہیں

۔۔۔۔۔(73)۔۔۔۔۔

مصلَحۃکہہ دیا میں نے مسلماں تجھے
تیرے نفس میں نہیں، گرمی یوم النشور

۔۔۔۔۔(74)۔۔۔۔۔

مضطرب باغ کے ہر غنچے میں ہے بُوئے نیاز
تُو ذرا چھیڑ تو دے، تشنۂ مضراب ہے ساز

۔۔۔۔۔(75)۔۔۔۔۔

معلوم نہیں، ہے یہ خوشامد کہ حقیقت
کہہ دے کوئی اُلّو کو اگر ’رات کا شہباز‘!

۔۔۔۔۔(76)۔۔۔۔۔

مقابلہ تو زمانے کا خوب کرتا ہوں
اگرچہ میں نہ سپاہی ہوں نے امیرِ جنود

۔۔۔۔۔(77)۔۔۔۔۔

مقام اس کا ہے دل کی خلوَتوں میں
خدا جانے مقامِ دل کہاں ہے!

۔۔۔۔۔(78)۔۔۔۔۔

مکاں فانی، مکیں آنی، ازل تیرا، ابد تیرا
خدا کا آخری پیغام ہے تُو، جاوداں تو ہے

۔۔۔۔۔(79)۔۔۔۔۔

مکر کی چالوں سے بازی لے گیا سرمایہ‌دار
انتہائے سادگی سے کھا گیا مزدور مات

۔۔۔۔۔(80)۔۔۔۔۔

مگر سرکار نے کیا خوب کونسل ہال بنوایا
کوئی اس شہر میں تکیہ نہ تھا سرمایہ داروں کا

۔۔۔۔۔(81)۔۔۔۔۔

مگر یہ پیکرِ خاکی خودی سے ہے خالی
فقط نیام ہے تُو، زرنگار و بے شمشیر!

۔۔۔۔۔(82)۔۔۔۔۔

مِلّت کے ساتھ رابطۂ اُستوار رکھ
پیوستہ رہ شجر سے، امیدِ بہار رکھ!

۔۔۔۔۔(83)۔۔۔۔۔

ممکن نہیں اس باغ میں کوشِش ہو بارآور تری
فرسُودہ ہے پھندا ترا، زیرک ہے مُرغِ تیز پر

۔۔۔۔۔(84)۔۔۔۔۔

ممکن ہے کہ تُو جس کو سمجھتا ہے بہاراں
اَوروں کی نگاہوں میں وہ موسم ہو خزاں کا

۔۔۔۔۔(85)۔۔۔۔۔

من کی دنیا! من کی دنیا سوز و مستی، جذب و شوق
تن کی دنیا! تن کی دنیا سُود و سودا، مکر و فن

۔۔۔۔۔(86)۔۔۔۔۔

من کی دولت ہاتھ آتی ہے تو پھر جاتی نہیں
تن کی دولت چھاؤں ہے، آتا ہے دھن جاتا ہے دھن

۔۔۔۔۔(87)۔۔۔۔۔

منفعت ایک ہے اس قوم کی، نقصان بھی ایک
ایک ہی سب کا نبیؐ، دین بھی، ایمان بھی ایک

۔۔۔۔۔(88)۔۔۔۔۔

موت کو سمجھے ہیں غافل اختتام زندگی
ہے یہ شام زندگی، صبح دوام زندگی

۔۔۔۔۔(89)۔۔۔۔۔

موت، تجدیدِ مذاقِ زندگی کا نام ہے
خواب کے پردے میں بیداری کا اک پیغام ہے

۔۔۔۔۔(90)۔۔۔۔۔

موسم اچھّا، پانی وافر، مٹّی بھی زرخیز
جس نے اپنا کھیت نہ سینچا، وہ کیسا دہقان

۔۔۔۔۔(91)۔۔۔۔۔

مومن کے جہاں کی حد نہیں ہے
مومن کا مقام ہر کہیں ہے

۔۔۔۔۔(92)۔۔۔۔۔

مہینے وصل کے گھڑیوں کی صورت اُڑتے جاتے ہیں
مگر گھڑیاں جُدائی کی گزرتی ہیں مہینوں میں

۔۔۔۔۔(93)۔۔۔۔۔

میخانۂ یورپ کے دستور نرالے ہیں
لاتے ہیں سرُور اوّل، دیتے ہیں شراب آخر

۔۔۔۔۔(94)۔۔۔۔۔

میری قُدرت میں جو ہوتا تو نہ اختر بنتا
قعرِ دریا میں چمکتا ہُوا گوہر بنتا

۔۔۔۔۔(95)۔۔۔۔۔

میرے بگڑے ہوئے کاموں کو بنایا تُو نے
بار جو مجھ سے نہ اٹھّا وہ اُٹھایا تُو نے

۔۔۔۔۔(96)۔۔۔۔۔

میرے کُہستاں! تجھے چھوڑ کے جاؤں کہاں
تیری چٹانوں میں ہے میرے اَب و جدَ کی خاک

۔۔۔۔۔(97)۔۔۔۔۔

میرے مٹنے کا تماشا دیکھنے کی چیز تھی
کیا بتاؤں اُن کا میرا سامنا کیونکر ہوا

۔۔۔۔۔(98)۔۔۔۔۔

میں اُن کی محفل عشرت سے کانپ جاتا ہوں
جو گھر کو پھونک کے دنیا میں نام کرتے ہیں

۔۔۔۔۔(99)۔۔۔۔۔

میں خود بھی نہیں اپنی حقیقت کا شناسا
گہرا ہے مرے بحرِ خیالات کا پانی

۔۔۔۔۔(100)۔۔۔۔۔

میں رہ منزل میں ہوں، تُو بھی رہ منزل میں ہے
تیری محفل میں جو خاموشی ہے، میرے دل میں ہے

۔۔۔۔۔(101)۔۔۔۔۔

میں ظلمتِ شب میں لے کے نکلوں گا اپنے درماندہ کارواں کو
شررفشاں ہوگی آہ میری، نفس مرا شعلہ بار ہو گا

۔۔۔۔۔(102)۔۔۔۔۔

میں کشتی و ملّاح کا محتاج نہ ہوں گا
چڑھتا ہوا دریا ہے اگر تُو تو اُتر جا

۔۔۔۔۔(103)۔۔۔۔۔

مِرے خم و پیچ کو نجومی کی آنکھ پہچانتی نہیں ہے
ہدَف سے بیگانہ تِیر اُس کا، نظر نہیں جس کی عارفانہ

۔۔۔۔۔(104)۔۔۔۔۔

مِلا محبّت کا سوز مجھ کو تو بولے صبح ازل فرشتے
مثالِ شمع مزار ہے تُو، تری کوئی انجمن نہیں ہے

۔۔۔۔۔(105)۔۔۔۔۔

مِلے گا منزلِ مقصود کا اُسی کو سُراغ
اندھیری شب میں ہے چیتے کی آنکھ جس کا چراغ

۔۔۔۔۔(106)۔۔۔۔۔

مدرسہ عقل کو آزاد تو کرتا ہے مگر
چھوڑ جاتا ہے خیالات کو بے ربط و نظام

۔۔۔۔۔(107)۔۔۔۔۔

میسّر آتی ہے فرصت فقط غلاموں کو
نہیں ہے بندۂ حُر کے لیے جہاں میں فراغ

۔۔۔۔۔(108)۔۔۔۔۔

مَیں تجھ کو بتاتا ہُوں، تقدیرِ اُمَم کیا ہے
شمشیر و سناں اوّل، طاؤس و رباب آخر

۔۔۔۔۔(109)۔۔۔۔۔

مُشرک ہیں وہ جو رکھتے ہیں مُشرک سے لین دین
لیکن ہماری قوم ہے محروم عقل و ہوش

---

آ -  ا -  ب -  پ -  ت -  ٹ -  ج -  چ -  ح -  خ -  د -  ڈ -  ذ -  ر -  ز -  س -  ش

ص -  ض -  ط -  ظ -  ع -  غ -  ف -  ق -  ک -  گ -  ل -  م -  ن -  و -  ہ -  ے

---