علامہ اقبال کے ہ سے اشعار

علامہ اقبال ؒ کے ’’ ہ ‘‘ سے اشعار

(کل تعداد : 63)

۔۔۔۔۔(1)۔۔۔۔۔

ہاتھوں سے اپنے دامن دُنیا نکل گیا
رُخصت ہوا دِلوں سے خیالِ معاد بھی

۔۔۔۔۔(2)۔۔۔۔۔

ہر اک مقام سے آگے مقام ہے تیرا
حیات ذوقِ سفر کے سوا کچھ اور نہیں

۔۔۔۔۔(3)۔۔۔۔۔

ہر ایک چیز سے پیدا خدا کی قدرت ہے
کوئی بڑا، کوئی چھوٹا، یہ اُس کی حکمت ہے

۔۔۔۔۔(4)۔۔۔۔۔

ہر ایک سے آشنا ہوں، لیکن جُدا جُدا رسم و راہ میری
کسی کا راکب، کسی کا مَرکب، کسی کو عبرت کا تازیانہ

۔۔۔۔۔(5)۔۔۔۔۔

ہر تقاضا عشق کی فطرت کا ہو جس سے خموش
آہ! وہ کامل تجلّی مُدّعا رکھتا ہوں میں

۔۔۔۔۔(6)۔۔۔۔۔

ہر چند کہ ہوں مُردۂ صد سالہ و لیکن
ظلمت کدۂ خاک سے بیزار نہیں میں

۔۔۔۔۔(7)۔۔۔۔۔

ہر چیز کو جہاں میں قدرت نے دلبری دی
پروانے کو تپش دی، جگنو کو روشنی دی

۔۔۔۔۔(8)۔۔۔۔۔

ہر حال میں میرا دلِ بے قید ہے خُرّم
کیا چھینے گا غنچے سے کوئی ذوقِ شکر خند!

۔۔۔۔۔(9)۔۔۔۔۔

ہر شاخ سے یہ نکتۂ پیچیدہ ہے پیدا
پَودوں کو بھی احساس ہے پہنائے فضا کا

۔۔۔۔۔(10)۔۔۔۔۔

ہر شے مسافر، ہر چیز راہی
کیا چاند تارے، کیا مرغ و ماہی

۔۔۔۔۔(11)۔۔۔۔۔

ہر کسی کی تربیت کرتی نہیں قُدرت، مگر
کم ہیں وہ طائر کہ ہیں دام و قفس سے بہرہ مند

۔۔۔۔۔(12)۔۔۔۔۔

ہر کوئی مستِ مئے ذوقِ تن آسانی ہے
تم مسلماں ہو! یہ اندازِ مسلمانی ہے!

۔۔۔۔۔(13)۔۔۔۔۔

ہر لحظہ نیا طوُر، نئی برق تجلیّ
اللہ کرے مرحلۂ شوق نہ ہو طے!

۔۔۔۔۔(14)۔۔۔۔۔

ہرلحظہ ہے مومن کی نئی شان، نئی آن
گفتار میں، کردار میں، اللہ کی برُہان!

۔۔۔۔۔(15)۔۔۔۔۔

ہر مسلماں رگِ باطل کے لیے نشتر تھا
اُس کے آئینۂ ہستی میں عمل جوہر تھا

۔۔۔۔۔(16)۔۔۔۔۔

ہر نفس ڈرتا ہوں اس اُمّت کی بیداری سے میں
ہے حقیقت جس کے دیں کی احتسابِ کائنات

۔۔۔۔۔(17)۔۔۔۔۔

ہزار بار حکیموں نے اس کو سُلجھایا
مگر یہ مسئلۂ زن رہا وہیں کا وہیں

۔۔۔۔۔(18)۔۔۔۔۔

ہزار پارہ ہے کُہسار کی مسلمانی
کہ ہر قبیلہ ہے اپنے بتوں کا زُنّاری

۔۔۔۔۔(19)۔۔۔۔۔

ہزار چشمہ ترے سنگِ راہ سے پُھوٹے
خودی میں ڈُوب کے ضربِ کلیم پیدا کر

۔۔۔۔۔(20)۔۔۔۔۔

ہزار خوف ہو لیکن زباں ہو دل کی رفیق
یہی رہا ہے ازل سے قلندروں کا طریق

۔۔۔۔۔(21)۔۔۔۔۔

ہزار کام ہیں مردانِ حُر کو دُنیا میں
انھی کے ذوقِ عمل سے ہیں اُمتّوں کے نظام

۔۔۔۔۔(22)۔۔۔۔۔

ہزاروں سال نرگس اپنی بے نُوری پہ روتی ہے
بڑی مشکل سے ہوتا ہے چمن میں دیدہ‌وَر پیدا

۔۔۔۔۔(23)۔۔۔۔۔

ہزاروں لالہ و گُل ہیں ریاضِ ہستی میں
وفا کی جس میں ہو بُو، وہ کلی نہیں ملتی

۔۔۔۔۔(24)۔۔۔۔۔

ہم پُوچھتے ہیں شیخ کلیسا نواز سے
مشرق میں جنگ شر ہے تو مغرب میں بھی ہے شر

۔۔۔۔۔(25)۔۔۔۔۔

ہم تو جیتے ہیں کہ دنیا میں ترا نام رہے
کہیں ممکن ہے کہ ساقی نہ رہے، جام رہے!

۔۔۔۔۔(26)۔۔۔۔۔

ہم تو فقیر تھے ہی، ہمارا تو کام تھا
سیکھیں سلیقہ اب اُمَرا بھی ’سوال‘ کا

۔۔۔۔۔(27)۔۔۔۔۔

ہم تو مائل بہ کرم ہیں، کوئی سائل ہی نہیں
راہ دِکھلائیں کسے، رہروِ منزل ہی نہیں

۔۔۔۔۔(28)۔۔۔۔۔

ہم جو جیتے تھے تو جنگوں کی مصیبت کے لیے
اور مرتے تھے ترے نام کی عظمت کے لیے

۔۔۔۔۔(29)۔۔۔۔۔

ہم سمجھتے تھے کہ لائے گی فراغت تعلیم
کیا خبر تھی کہ چلا آئے گا الحاد بھی ساتھ

۔۔۔۔۔(30)۔۔۔۔۔

ہم سے پہلے تھا عجب تیرے جہاں کا منظر
کہیں مسجود تھے پتھر، کہیں معبود شجر

۔۔۔۔۔(31)۔۔۔۔۔

ہم کو تو میسّر نہیں مٹّی کا دِیا بھی
گھر پیر کا بجلی کے چراغوں سے ہے روشن

۔۔۔۔۔(32)۔۔۔۔۔

ہمارا نرم رو قاصد پیامِ زندگی لایا
خبر دیتی تھیں جن کو بجلیاں وہ بے خبر نکلے

۔۔۔۔۔(33)۔۔۔۔۔

ہند کے شاعِر و صُورت گر و افسانہ نویس
آہ! بیچاروں کے اعصاب پہ عورت ہے سوار!

۔۔۔۔۔(34)۔۔۔۔۔

ہند میں حکمتِ دیں کوئی کہاں سے سیکھے
نہ کہیں لذّتِ کردار، نہ افکارِ عمیق

۔۔۔۔۔(35)۔۔۔۔۔

ہو تیرے بیاباں کی ہوا تجھ کو گوارا
اس دشت سے بہتر ہے نہ دِلّی نہ بخارا

۔۔۔۔۔(36)۔۔۔۔۔

ہو حلقۂ یاراں تو بریشم کی طرح نرم
رزمِ حق و باطل ہو تو فولاد ہے مومن

۔۔۔۔۔(37)۔۔۔۔۔

ہو صداقت کے لیے جس دل میں مرنے کی تڑپ
پہلے اپنے پیکرِ خاکی میں جاں پیدا کرے

۔۔۔۔۔(38)۔۔۔۔۔

ہو کوہ و بیاباں سے ہم آغوش، و لیکن
ہاتھوں سے ترے دامنِ افلاک نہ چھُوٹے!

۔۔۔۔۔(39)۔۔۔۔۔

ہوگیا مانندِ آب ارزاں مسلماں کا لہو
مضطرب ہے تُو کہ تیرا دل نہیں دانائے راز

۔۔۔۔۔(40)۔۔۔۔۔

ہو مرا کام غریبوں کی حمایت کرنا
دردمندوں سے، ضعیفوں سے محبت کرنا

۔۔۔۔۔(41)۔۔۔۔۔

ہو مرے دَم سے یونہی میرے وطن کی زینت
جس طرح پھُول سے ہوتی ہے چمن کی زینت

۔۔۔۔۔(42)۔۔۔۔۔

ہو نہ یہ پُھول تو بلبل کا ترنُّم بھی نہ ہو
چمن دہر میں کلیوں کا تبسم بھی نہ ہو

۔۔۔۔۔(43)۔۔۔۔۔

ہوتا ہے کوہ و دشت میں پیدا کبھی کبھی
وہ مرد جس کا فقر خزف کو کرے نگیں

۔۔۔۔۔(44)۔۔۔۔۔

ہوتا ہے مگر محنت پرواز سے روشن
یہ نکتہ کہ گردُوں سے زمیں دُور نہیں ہے

۔۔۔۔۔(45)۔۔۔۔۔

ہوئی جس کی خودی پہلے نمودار
وہی مہدی، وہی آخر زمانی!

۔۔۔۔۔(46)۔۔۔۔۔

ہوئی جنبش عیاں، ذرّوں نے لطفِ خواب کو چھوڑا
گلے ملنے لگے اُٹھ اُٹھ کے اپنے اپنے ہمدم سے

۔۔۔۔۔(47)۔۔۔۔۔

ہیں جذبِ باہمی سے قائم نظام سارے
پوشیدہ ہے یہ نکتہ تاروں کی زندگی میں

۔۔۔۔۔(48)۔۔۔۔۔

ہیں ساز پہ موقُوف نوا ہائے جگر سوز
ڈھیلے ہوں اگر تار تو بیکار ہے مِضراب

۔۔۔۔۔(49)۔۔۔۔۔

ہیں لوگ وہی جہاں میں اچھّے
آتے ہیں جو کام دوسرں کے

۔۔۔۔۔(50)۔۔۔۔۔

ہے تری شان کے شایاں اُسی مومن کی نماز
جس کی تکبیر میں ہو معرکۂ بود و نبود

۔۔۔۔۔(51)۔۔۔۔۔

ہے جو ہنگامہ بپا یورشِ بلغاری کا
غافلوں کے لیے پیغام ہے بیداری کا

۔۔۔۔۔(52)۔۔۔۔۔

ہے خاکِ فلسطیں پہ یہودی کا اگر حق
ہسپانیہ پر حق نہیں کیوں اہل عَرب کا

۔۔۔۔۔(53)۔۔۔۔۔

ہے عاشقی میں رسم الگ سب سے بیٹھنا
بُت خانہ بھی، حرم بھی، کلیسا بھی چھوڑ دے

۔۔۔۔۔(54)۔۔۔۔۔

ہے عجب مجموعۂ اضداد اے اقبالؔ تو
رونقِ ہنگامۂ محفل بھی ہے، تنہا بھی ہے

۔۔۔۔۔(55)۔۔۔۔۔

ہے عیاں یورشِ تاتار کے افسانے سے
پاسباں مل گئے کعبے کو صنم خانے سے

۔۔۔۔۔(56)۔۔۔۔۔

ہے فکر مجھے مصرعِ ثانی کی زیادہ
اللہ کرے تجھ کو عطا فقر کی تلوار

۔۔۔۔۔(57)۔۔۔۔۔

ہے کس کی یہ جُرأت کہ مسلمان کو ٹوکے
حُریّتِ افکار کی نعمت ہے خدا داد

۔۔۔۔۔(58)۔۔۔۔۔

ہے مری ذلّت ہی کچھ میری شرافت کی دلیل
جس کی غفلت کو مَلَک روتے ہیں وہ غافل ہوں میں

۔۔۔۔۔(59)۔۔۔۔۔

ہے مُریدوں کو تو حق بات گوارا لیکن
شیخ و مُلّا کو بُری لگتی ہے درویش کی بات

۔۔۔۔۔(60)۔۔۔۔۔

ہے وہی تیرے زمانے کا امامِ برحق
جو تجھے حاضر و موجود سے بیزار کرے

۔۔۔۔۔(61)۔۔۔۔۔

ہَوا ہے گو تُند و تیز لیکن چراغ اپنا جلا رہا ہے
وہ مردِ درویش جس کو حق نے دیے ہیں اندازِ خسروانہ

۔۔۔۔۔(62)۔۔۔۔۔

ہُوئی دِین و دولت میں جس دم جُدائی
ہوَس کی امیریِ، ہوَس کی وزیری

۔۔۔۔۔(63)۔۔۔۔۔

ہُوئی ہے زیرِ فلک اُمتوں کی رُسوائی
خودی سے جب اَدب و دِیں ہُوئے ہیں بیگانہ

---

آ -  ا -  ب -  پ -  ت -  ٹ -  ج -  چ -  ح -  خ -  د -  ڈ -  ذ -  ر -  ز -  س -  ش

ص -  ض -  ط -  ظ -  ع -  غ -  ف -  ق -  ک -  گ -  ل -  م -  ن -  و -  ہ -  ے

---